Tres días tiveron que empregar os máis de 300 militares desprazados a Galicia e os medios mobilizados pola Xunta –37 brigadas, 33 axentes forestais, 23 motobombas, oito helicópteros e sete avións– para dar por controlado o incendio que reduciu a cinzas o corazón das Fragas do Eume. A incógnita é o alcance das chamas, xa que desde o domingo pola mañá, a pesar de que o lume saltou do municipio da Capela –onde se orixinou o sábado pouco despois das 15.00 horas– aos concellos das Pontes, Monfero e Vilarmaior, a Consellería de Medio Rural mantén inalterable o balance: 750 hectáreas devastadas, unha cifra moi afastada das polo menos 2.000 héctareas afectadas o lume que xa o domingo estimou o alcalde da Capela, Manuel Meizoso.
E das 750 hectáreas que oficialmente foron devoradas polas chamas, Xunta e PP parecen non porse de acordo sobre a extensión afectada no parque natural eumés. Mentres as Consellerías de Medio Ambiente e de Medio Rural reducen a 370 as hectáreas calcinadas nesta xoia paisaxística, o último bosque atlántico de Europa, o PP elevou a unhas 900 as hectáreas afectadas no parque natural. "O incendio afectou como moito ao 10% [das 9.126 hectáreas de parque natural]", apuntou o portavoz do PP galego, Pedro Puy. Unha estimación coa que horas máis tarde coincidiu o propio presidente da Xunta, Alberto Núñez Feijóo: "O incendio xa está controlado. O perímetro do incendio non se estendeu fóra do que xa onte [polo domingo] tiñamos. Máis do 90% dese bosque segue intacto".
Nunha reunión en Monfero cos alcaldes do cinco municipios que abarca o parque natural eumés –A Capela, As Pontes, Monfero, Pontedeume e Cabanas–, o conselleiro de Medio Ambiente, Agustín Hernández, reduciu a 370 as hectáreas de "alto valor ecolóxico" devastadas no o espazo protexido. "Na zona de maior reserva, a afección non é moi substancial", sentenciou Hernández, tras reunirse cos técnicos do parque. Á espera dun diagnostico máis exhaustivo, Hernández negou "categoricamente" a desaparición da fraga. "Baixo ningún concepto as fragas desapareceron", replicou o conselleiro ao alcalde da Capela, que o día anterior manifestara que o parque natural "morreu".
O conselleiro de Medio Ambiente trasladou aos alcaldes a disposición do Ministerio de Agricultura a traballar coa Xunta nun "plan conxunto" para a rexeneración da superficie afectada e frear o arrastre de cinzas ao Eume.
Pola súa banda, o delegado do Goberno, Samuel Juárez, que onte visitou aos militares desprazados a Galicia, reiterou a intencionalidade do incendio: "Son varios focos. Practicamente a única posibilidade é que fose provocado". "Hai xente que lle gusta ver arder o monte", manifestou.
Ás 20.00 horas de onte, a Consellería de Medio Rural emitiu o último parte do día polo que xa daba por controlado o incendio que comezou o sábado na Capela e que, segundo todos os indicios, foi intencionado –tres focos simultáneos nun punto de fácil propagación, tanto pola localización, como o vento e a hora: o miradoiro de Teixido–. Horas antes, a Xunta decidira levantar o nivel de alerta 1 que activara axiña que como se declarou o lume como medida de precaución pola proximidade das chamas a varios núcleos habitados. A proximidade do lume ás vivendas obrigou o sábado pola tarde ao desaloxo de case 300 veciños, aínda que finalmente puideron ir durmir ás súas casas esa mesma noite. Sobre os dous incendiarios detidos en Neda, Juárez desvinculounos "de momento" do lume nas Fragas.
